ያኢ ብዓይነት ተሪፉ 10 ተቓወምቲ ውልቀሰባት 10 ውድባት ብምስራሕና ካን ዘድማዕና ኮይኑ ዝስመዓና “ተቓወምቲ ሎሚ ዝበን፡” ጉድና ይፈለጥ…ተቕውሞና ንመን ከም ዝቃወም ተደናጊሩዎ ብዘይ ቁምነገር ዓጸቦ ኣትዩዎ ናብ ህሉው ሬሳ ተቐዪሩ’ዩ…“ኣይፋልካን ኣንታ ትዃን!” ኣብ ክንዲ ምባል ካን ጣቋ ተደልዩሉስ፡ ሓንሳብ ብዓሌት፡ እንሓንሳብ ብሃይማኖት፡ ኣብ ገለ እዋናት’ውን ብኣውራጃ፡ ወረዳ፡ ዓዲ፡ ማይ ቤት ኮታ እምንን ዕንጨይትን ተወሲኹዎ፡ ኩሉ ኣብ መልክዕ ኤርትራ እምበር ንኤርትራና ዘይመልእ ዓዘር ቖዘር ቁምንገር ኮይኑስ፡ ከም ፍታሕ ናይ’ዚ ተካል ሕሰም’ዚ ኮይኑ ክቐርብ ይወዓልን፡ ይሕደርን ኣሎ…ነዚ ዘይውቁብን ዘይጥቁውን ቃልሶም፡ ያኢ ጋማ ክኣስሩሉን ወረግ እተኾይኑሎም’ውን ኣብ ዘይእንታዮም ተሰቒሎም ሃገር ክዘምቱ ዝዕጠቑ ዘሎዉ ጸናጹ ንሪኢ ከይንህሉ እፈርህ ኣሎኹ።

 *******************************************

ንለባምን ኣምተሉ ኣበይ ከይስሕቶ፡

እንተ ንዓሻ ግን ደርጉሓሉ ኣበይ ከይፈልጦ።

ብርኽቲ ሃገርና፡ ብሳላ ዘይተሓለለ መስዋእቲ ደቃ፡ ከም ኩለን ሃገራት ዓለምና ከተፍርን ክትፈርን ካብ እትዳረግ ዳርጋ 20 ዓመታት ኮይኑ እኖሆ። ብዘይሕብእ ምብእ’ውን፡ ንወዮ ዝፈረየ ቁሩብ ቁራቦ ለለልዩ ንበይኑ ዝቛርፍ ተካል ስርዓት ኣጋጢሙዋ ብጥምየት፡ ብንድየት፡ ብስእነት፡ ብሙህሮ መዳርግቲ ዳርጋ ዝተሳእና ድሕርቲ ሃገር ዝብል ኣኽሊል ለቢሳ ኣላ። ብዘይካ ነቶም ከም ከልቢ ቁንጣሮ ዝምንጠዉ ዳርጋ ለማኖ ዓውዲ ዘሕበኑላን ዝኾርዑላን ውሑዳት፡ ዝተረፍናስ እተሕንኽ ሃገር ኮይናትና፡ ኣብ ልዕሊ መቓብር ጀጋኑና ተዓዚምና “እህህ!” ክንብል ንርከብ።

ንሃገርና መሊኹ ዝንዉነው ዘሎ ስርዓት፡ ወዮ መትካእታን መዋድቖን ተደናጊሩዎ: መን ይፈልጥ ካብኡ ዝሓይሽ ስኢኑ:  ንባዕሉ ኣብ ድነ ተሓቢኡ፡ ሃገር ብሙሉኡ ኣብ ጸላም እንተ’ንበረስ፡ ንምንታይ ዘይፈልጦ ገበረ ዝበሃል ኮይኑ? ወዮ ደኣ፡ ‘ሎሚ ኾነ: ሓምለ ኾነ’ ኮይኑ’ምበር፡ ሕልሚ ስርዓት ህ.ግ.ደ.ፍ. ኣብ ንእስነት ገለ መራሕቲ ዝለሓዅ ወኒ ጦብያዊ ዴስነት፡ ሕጂ ሽራራን ኩርማጅን ዝወነነ በዓል 44 ቆለ በቒዑ ቻይናን ኮርያን ኣዚዙ  እነተዘይተሸሪጡሉ መዓስ ፍታሕ ከምጽኣልና ኮይኑ። ግን እዞም ሰብ ቆለ ደጊም ኣሪጎም እንድዮም  ዝፍትኖም ደኣ ስኢኖም ኣሎዉ’ምበር ብመለክያ ኣረቂ ምተጋለጋሉልና ነይሮም’ዮም።

ተቓውሞና ማዕረ ናጻዊት ሃገርና ጥራሕ ዘይኮነስ ብኹኑኡ’ውን እንድዩ፡ ማለት ጽባሕ ጽባሕ ዝንክን ዝውስኽን፡ ኣብ ገለ ገለኡ’ውን ምግምዳሕ ዘይገደፈ ሃብታም ተሞክሮ’ዩ።  ያኢ ብዓይነት ተሪፉ 10 ተቓወምቲ ውልቀሰባት 10 ውድባት ብምስራሕና ካን ዘድማዕና ኮይኑ ዝስመዓና “ተቓወምቲ ሎሚ ዝበን፡” ጉድና ይፈለጥ። ህዝቢ ዘይፈልጦም ዝነበሩ ውድባት ካን ፖሊቲካዊ ተቓውሞና ወርጺጹ ተባሂሉ፡ ኣብ ጽፍሒ ተቓውሞና ብዘይጣባያቶም ተጸንቢሮም፡ ብዘይብእኦም ንቡሱሩ ሃሊኻ ንዝጸንሐት መንኮርኮር ተቓውሞና ተርፈንኣ ዝነበራ ስብሒ ሃሊኸን ብሕጺጽ ባዕልና ጸሚምና ንሰማዒና’ውን ካብ እነሸግር መዓስ ግዜ ሓጺሩ።

ተቕውሞና ንመን ከም ዝቃወም ተደናጊሩዎ ብዘይ ቁምነገር ዓጸቦ ኣትዩዎ ናብ ህሉው ሬሳ ተቐዪሩ’ዩ። ንሃገርና ዓትዒቱ ደም ዝሓጉማ ዘሎ፡ “ኣይፋልካን ኣንታ ትዃን!” ኣብ ክንዲ ምባል ካን ጣቋ ተደልዩሉስ፡ ሓንሳብ ብዓሌት፡ እንሓንሳብ ብሃይማኖት፡ ኣብ ገለ እዋናት’ውን ብኣውራጃ፡ ወረዳ፡ ዓዲ፡ ማይ ቤት ኮታ እምንን ዕንጨይትን ተወሲኹዎ፡ ኩሉ ኣብ መልክዕ ኤርትራ እምበር ንኤርትራና ዘይመልእ ዓዘር ቖዘር ቁምንገር ኮይኑስ፡ ከም ፍታሕ ናይ’ዚ ተካል ሕሰም’ዚ ኮይኑ ክቐርብ ይወዓልን፡ ይሕደርን ኣሎ። “ንበዓል ነጎዳስ ብሓዊ ትኩሶ።” ከምዝበሃል’ውን ወዮ ብዘይብኡኡ ደርገፍገፍ ክብል ዝጸንሐ ተቓውሞ ዓሌትና’ባ፡ ሃይማኖትና’ባ፡ ወገንና ደኣ’ባ ዝብሉ ዲምክራሲ ዘየርክቦም፡ ፍትሒ ዘይትንክፎም፡ ማዕርነት ዝመነዉ፡ ንኣሽቱ መለኽቲ መሕብኢ ገይሮሞ። ንወዮ ምድሕርሓር ዝበሃል ማቕ ለቢሶም ጥራሕ ከይኣክል፡ ከይሓነኹ ንኽረኣዩሉ ንሰማይ ገጾም ተበርጢጦም ዘንቃዕርሩሉ እዋናት ኣርኪብናሉ እኖ’ና።

ተቓውሞና ካብቲ መሰረቱን መስመሩን ኣልጊሱ ኣብ ቀንጠ መንጢ ንኽወርድን ብግቡእ ንኸይገጥምን ንኸይድምዕን፡ በዞም ካብ ውሑድ ዝቖናጥሩ፡ ‘ዘበናውያን’ ኢና በሃልቲ ንኽሕልቑዎ ይፈታትኑ ኣሎዉ። ተቓውሞናን ትሕቲ 1% ካብ ህዝቢ ኤርትራ ሓቚፉ ምህላዉ ኣዕርዮም እንዳፈለጡ ልዕሊ ዓቕሞም ዝትርበቡ፡ ዘይናቶም ስልጣን ዘማቓርሑን ኣብ ሕልምታት ጥራሕ ዝነብሩን፡ ዝተጠልቅዑ ትዃናት ጉድ ገይሮ’ሞ ኣሎዉ ንቓልስና።

ሕጂ ኸኣ እዚ ጥራሕ ከይኣኽለና፡ ነዚ ዘይውቁብን ዘይጥቁውን ቃልሶም፡ ያኢ ጋማ ክኣስሩሉን ወረግ እተኾይኑሎም’ውን ኣብ ዘይእንታዮም ተሰቒሎም ሃገር ክዘምቱ ዝዕጠቑ ዘሎዉ ጸናጹ ንሪኢ ከይንህሉ እፈርህ ኣሎኹ። ግን ሓደ ክፈልጡዎ ዘሎዎም፡ ብሱሩ ንዲሞክራስያዊ ቃልሲ ህዝቢ ኤርትራ ከም’ዚ ሕጂ ኣብ ስልጣን ሃገርና መሊኹ ንግዜኡ ኣደናጉዩዎ ዘሎ፡ ከዳንጉዩዎ እምበር ካብ መትከላቱ ከዘናብሉዎስ ፍጹም ኣይኮነሎምን’ዩ። መኽንያቱ ዕጥቅና ኣንጻር መን ብዘይገድስ፡ ቃልሲ ህዝብን ዲሞክራስያዊት ኤርትራ ንምህናጽ ስለዝኾነ ዝስዕሮ ፍጹም የልቦን።

ይፈቶ ይጸላእ ከምቲ ኣብ መእተዊ ጽሑፈይ ዝበልኩዎ ዲክታቶርያዊ ስርዓት ህ.ግ.ደ.ፍ. ሕልሚ’ሎዎ። ሕጂ ሕብእ ይውዓሎ ይሕደሮ ጦብላሕታ ውልቀሰብ ዝደረታ ‘ዴሳዊት ኤርትራ’ ንምህናጽ’ዩ። ስለዚ’ውን፡-

-ጸረ ሃይማኖት’ዩ?

እወ!!!!!!!!!!!!!።

ምዃን ደኣ ኣብዩዎ’ምበር እተን ሰሙናውያን ቅዱሳት መዓልታት፡ ማለት ዓርቢ ንእስላም፡ ሰንበትን ንኽርስትያን፡ እቲ ሃይማኖታዊ ትርጉመን ከየገደሶ፡ መዓልቲ ቐዳም ከም ማእከላዊት ክመርጽ ዝተወናወነ ጥራሕ ዘይኮነስ ዝፈተነውን እንድዩ።

እቲ ሓቂ እዚ እንክንሱ፡ ሕጂ ኣብ ተቓውሞና ዝስማዕ ዘሎ ቃንዛ እንታይ ምዃኑ የደናግረካ። ማለትሲ ኣብ ኢዱ ዝተሃስየ ሰብ፡ ቃንዛኡ ኣብ ኢዱ እንክንሱ፡ ቃንዛይ ኣብ ኣግረይ’ዩ ዘሎ ዳርጋ ምባል ኮይኑ። ፈዋሲ’ውን ኢድ ገዲፉ እግሪ ክሕክም ከንቱ ጻማ’ዩ። ምሕዋይ’ውን የልቦን፡ ምጉናይ እንተዘይኮይኑ። እሞ ንምንታይ እዮም እዞም ብስሩ ንህዝቢ ኤርትራ ዓትዒቱ መሊኹ ንዘሎ ስርዓት ንምልጋስ፡ ኣብ ዋንነት ናይ’ቲ ጸገም ብዛዕባ ህዝቢ ኤርትራ ኣብ ክንዲ ዝዛረቡ፡ ኣብ መላግሶ መንገድታት ዝጓዓዙ? ዶኾን ነቲ ምልኪ ዝብል ጥምረሕሳብ መግለጺኦም ዝፈላለ ኮይኑ? ምናልባት። እሞ ምልኪ እንታይ ግዲዩ?

ምልኪ፡ ብምርጫ ህዝቢ ዘይኮነስ፡ ውልቀሰብ ንስልጣን ሃገር ባዕሉን ብዝደለዮን ብሓይልን ከጓዓዕዞ ክፍትን እንከሎ ዝግለጸሉ ዓይነት ምሕደራ’ዩ። መላኺ ቀንዲ ጸላኢ ማዕርነታዊ መሰላት ደቂሰባት’ዩ፡ ስለዚ’ውን ውልቀመሰላቱ ካብ ኩሉ ወዲሃገር ንላዕሊ ሓለፋ ኣሎዎ። 

“ደቂሰብ ምስ ነጻነቶም’ዮም ዝውለዱ፡ ከምኡ’ውን ብመሰልን ክብረትን ማዕረ’ዮም። ናይ ምሕሳብን ምትግባርን ፍሉይ ተውህቦ ስለዘሎዎም’ውን ኣብ ሓድሕዶም ብሕውነታዊ ሂወት ክነብሩ ኣሎዎም።” እዩ ዝብል እቲ ቀዳማይ ምዕራፍ ዓለምለኻዊ መስልደቂሰባት ንምኽባር ኣብ 1948 ዝጸደቐ ኣዋጅ መሰላት ደቂ ሰብ።

ኩሎም መለኽቲ ብኣንጻርነት ናይ’ዚ ኣምር’ዚ ዝነብሩ ዓመጽትን ጸረ ብዙሓትን’ዮም። ስለዚ’ዮም እውን ቆጽሊ ህዝቢ ዘይወደቖም ዝበሃሉ። መራሒ: ቆጽሊ ህዝቢ ክህሉዎ ወይ’ውን ፍቓድ ህዝቢ ክረክብ፡ ብኡ መሰረት’ውን ክለቅቕ: ንኣወኻኽላኡ ዘድሊ መሳርሒ ወይ ቅዋም ክህሉ ኣሎዎ። በዚ መዓቀኒ’ዚ እዮም’ውን እዞም መለኽቲ ጸረ ብዙሕነት/ዲሞክራሲ ከምኡውን ጸረ ህዝባዊ ቅዋማዊ ስርዓታት ዝኾኑ።

እሞ እዚ ኣብ ሃገርና ዘሎ መላኺ ስርዓት፡ ብኸመይ’ዩ ተሓላቒ ሃይማኖት’ዩ ዝበሃል? ብፍሉጥ ኣይኮነን። ግን እንታይ ይገበር “ይኣኽለና ብዝሓለፈ፡ ይምሓረና ብዝተረፈ።” ከምዝባሃል፡ ንዝሓለፈ እንታይ ዝበሃል ሃልዩዎ። እቶም በሃልቲ ኣብ ልቦም ይምለሱ ይኾኑ። ግን ሕጂ ‘ብሔረ ትግርይና’ ዝበሃሉ ምትእኽኻብ ካብ ተቐልቀሉ፡ ኣቦታት ከምዚ ምስ ረኸቡ’ዮም “ተሓጺብካስ ኣብ ጭቃ።” ዝብሉ። እሞ ‘ምንቅስቓስ ክርስትያን’ ዝብል እንተሰዓበ እንታይ ዋሕስ ዝዕገቶ ጉዳይ ኮይኑ? ግን መን ይፈልጥ፡ ኣሎና ዝብሉ እንተተረኽቡ ምስ’ዚ ኣብ ላዕሊ ሰፊሩ ዘሎ ቅዋም መሰላት ደቂሰብ ብኸመይ እዮም ክወሃሃዱ? ኣይፋል ኣይከውንን’ዩ። “ገመል ሰሪቕካስ ጉምብሕ ጉምብሕ።” ኣይከውንን’ዩ። ብስም ሃይማኖት ኣመሳሚስካ ፖልቲካዊ ስልጣን ኣብ ሃገርና፡ ኣይሰርሕን’ዩ። ምናልባት ምትእኽኻብ ደረኽቲ (ፕረዥር ግሩፕ) እንተዝኾኑ ዓቢ ቁምነገር ምኾነ።

እሞ ፖሊቲካውያን ሃይማኖታውያን ውድባት ይኹኑ ምንቅስቓሳት፡ ማዕርነታውያን ክኾኑ ዘይከኣል ስለ ዝኸውን፡ ኣብ ፖሊቲካዊ ስልጣን ክተኣታተዉ እንተኾይኖም፡ ብኡንባኣኡ መለኽቲ’ዮም። ስለዚ’ውን ምልኪ ንምልጋስ ብቕዓት የብሎምን። ምናልባት ብሰንኪ መግዛእቲ ይኹን ምልኪ ፍልልይ ኣብ መንጎ ሰዓብቲ ዝተፋለለዩ ሃይማኖታት ርሒቡ፡ ንኹሉ ብማዕረ ምጥማቱ ንባዕሉ ዘይማዕርነት’ዩ ዝብል ሓሳብ መን ክጸልኦ? ነዚ ፍልልይ ንምጽባብ ምጥማራት የድሊ እንተተባሂሉ፡ ቅድዊ። ብኸምዚ ዝሕለቑን ፍታሓት ዘናድዩን፡ ዝሕግዙን ዝቃለሱን ኣይምተጸልአን። ዝጽላእ ዘሎስ ነዚ ራኢ’ዚ ብመትከል ንዝኣመነን እሞ ንዝቃለሰሉ ዘሎን ኽቃለሰሉ ዝወሰነን ንዝተቓለሰሉን’ውን፡ ከምቲ ኣበዋትና ዝብሉዎ፡ “ደረቕይና ጓልሲ ንወላዲታ ሕርሲ ክትምህር ትመጣጠር።” ከምዝበሃል ቋንቋ ቀዪርካ፡ ኣበሃህህላ ኣመዓራሪኻ ከም ሓዲሽ ዝተፈጠርካ ሓኪም ምምሳል ኣይጣቋን። እኳደኣ ፍልልያት ህዝብና ንምጽባብ ትሕተ ቅርጻታት ሃገርና ብጉቡእ ክማቓራሕ ክኽእል ኣሎዎ፡ ማለት “እቲ ድሒሩ ዝበሃል ህዝብና ነቲ ቀዲሙ ዘሎ ምእንታን ንኽመዓራረ ሓለፋታት የድልዮ’ዩ።” እንዳበለ ንመዋዕል ዝተቓወመ ኤርትራዊ ፖሊቲካዊ ራኢ፡ ብዘይ ምሕረት ከም ኣካልን ኣምሳልን ናይ መላኺ ስርዓትን ጸረ’ዚ ማዕርነታዊ ሓሳብን ጌርካ ብምግላጽ ንምግላል ዝግበር ዘሎ ዓለታዊ፡ ሃይማኖታዊ ዘመተ ጽበት ኮይኑ ንምልኪ ዝቕልብ እንበር ከውድቕ ዘይብቅዕ ጎናይ ተግባር ኮይኑ ዘይጥቁው’ዩ። 

ዝገርም እኮ’ዩ። ካብ መዓስ’ዩ ኣብ ፖሊቲካዊ ዲምክራስያዊ መስርሕ 50% ድምጺ ኣሎኒ’ሞ ሃገር ክመርሕ ይኽእል’የ ብምባል ንኹሉ ዝተርፈ 50% ኣይተድልየኒን ኢኻ እንዳበለ ብኣዋጅ ዝዳግን? ሕጂ ኣብ ተቓውሞና ንርእዮ ብምህላውናን፡ ንዋዕላ ኣዲስ ክመልኽ ተኣንጎት ተሸብሸብ ይበሃል ምህላዉን ድንቂ’ዩ። እንተገደድ ገደድስ 51% ድምጺ ክረክብ’የ እኳ ኣይበሃልን? ነታ 1% ድምጺ ንምውሓስ ፖሊቲካዊ ጣቋ፡ ምብልሓት፡ ምጽማድ የድልዮ’ዩ። ግን መለኽቲ፡ ጽምዶ ዝበሃል ኣይፈልጡን’ዮም፡ ምምላኽ’ምበር። መኽንያቱ ጽምዶ እንካን ሃባን ስለ ዝደሊ ማዕርነታዊ ባህሪ ኣሎዎ።

ምልካዊ ስርዓት ኤርትራ ብድሕሪ ምልጋሱ፡ ሃገርና ብማዕርነት ክትመሓደር ኣሎዋ ዝብሉ’ሞ ግን ብኡ ንብኣኡ ነት ሓቀይና ትርጉም ማዕርነት ክዕምጹ ዝደልዩ እንዳተዋሃላለሉ እዮም። ግን ኣብ ማዕርነት እቲ እንኮ ኤርትራዊ፡ እታ እንኮ ኤሪትራዊት ኣበይ ክሓብኡዎ ይደልዩ? እቲ ማዕርነት ካብዚ ብሩህ ነጥቢ ክነቅል ክሳብ ክንደይ ምቐለለ? እቶም ካብዚ መባእታዊ መበግሶ እንጥምት ንምልኪ ንኽንመዝኖ ኣየጸግመናን እዩ። እወ ንሕና ዕልማናውያን መበገሲናን መብጺሒናን ንሱ’ዩ። እንታይዶስ ኣበይዶስ ኢሉ ኣብ ጓል መገዲ ዘማስን ዝሓድርን ኣይኮነን።

እቲ ዝገርም ገለ ፈላጣት ኢና ብሃልቲ ከም ዝነግሩና ዘሎዉ ጥራሕ ዘይኮነስ፡ ኣብ ክካየድ ዝበሃል ዘሎ ዋዕላ ብደውኩም፡ መጻኢት ኤርትራና፡ ስልጣናታ፡ ምሕደራታት ተር ከም ዓተር ፍርቂ ብፍርቂ ክሕዛእ ኣሎዎ እንተዘይኮይኑ ብቑልቁል ኣብ ክልተ ክትጉዘ’ያ ይብሉ። የፍርህ። ዝገርም’ኮ’ዩ። ግን “ምብላዕካ ዝለመደስ፡ እንክሪአካ ይንባሁቕ።” ከም ዝበሃል፡ እዞም ኣብ ምፍልላይ ብምንባር ያኢ ፖሊካዊ ስልጣናቶም ከውሕሱ ዝደልዩ ‘ምሁራት’ ንምፍልልያት ናብ ዝለዓለ ጥርዙ መጢጦም፡ ህዝቢ ፈላልዮም፡ ስልጣናቶም ክከረጋግጹ እንተደለዩ ሓዲሽ ምህዞ ኣምጺኦም ማለት ስለ ዘይከውን፡ እቶም በዚ ኣንጻር ንውሕስነት ፖሊቲካዊ ስልጣኖም፡ ሃይማኖት ዘይዓግቶ፡ ዓሌት ዘይድርቶ፡ ጂኦግራፍያዊ ሕንጻታት ዘይመልሶ፡ ኣብ ናጽነት ውልቀ ኤርትራዊ ኣንሳፊፉ ሰላማዊት ሃገር ብምውሓስ፡ ናጽነት ህዝባ ኣዕኲኻ ካብኡ’ውን እትቕለብ ምዕብልቲ ኤርትራ ንምትካል ጽባሕ ዘይበሃሎ ዕጥቂ ሎሚ ስለ ዝኾነ ብዘይስክፍታ ሕጂ ዓቲቦም ክብገሱ ኣሎዎም። ሎሚ እምቢ ክበሃል ንዝግባኦ፡ ሎሚ መዓልቲ ‘እምቢ!’ ክብሉ ክኽእሉ ኣሎዎም። ኤርትራ ንድሕነት ክንመርሕ እንተደሊና ኣብ ድሕንነታዊ ኣጀንዳታታና እምበር ኣብ’ቲ ፈላለዪ ኣጀንዳታቶም ክንነብር ኣይግባእን’ዩ።

ደክታቶርያዊ ስርዓት ኤርትራ ጸረ ዓሌት’ዩ?

እወ!!!!!!!።

ደክታቶርያዊ ስርዓት ኤርትራ ጸረ ብሔር’ዩ?

እወ!!!!!!!!።

ደክታቶርያዊ ስርዓት ኤርትራ ጸረ ሰብኣውነት’ዩ?

እወ!!!!!!!።

ዲክታቶርያዊ ስርዓት ጸረ ኹሉ’ዩ?

እወ!!!!!!!።

ስለዚ ብዛይካ ሓቢርካ ምቅላስን፡ ኩሉ ኤርትራዊ ኮታ ምስ ኩሉ ኤርትራዊ ዝምባለታቱን መንነቱን  ናጻ ምውጻእ መተካእታ የልቦን።

ክብርን ዝኽርን ንስዉኣትና!

ፈጣሪ ሃገርና ይባርኸልና!

ሃይለ፡ ወልዱ።

ሎንዶን።

Comments (0) >>

Write comment

Name

Email

Comment

Write the displayed characters

Add Comment