هِگْيا أَمانْ مَرّارْتا وإِبِيتْ, حِبُوعْ تَفَگِرْ وسِتُورْ

هِگْيا حَسَّتْ طِعِمْتا وفِتِيتْ, دُفُونْ تحَبعْ وقُبُورْ

رِحِيئ رَبي تُو نِيسآيَا, حُمُويْ أنَا ومُرُورْ

اِسَلامْ تُو دِينْيئ, بُدُّولْ مِنُّو إِيْ أَنَا وقُيُورْ

 ********************************************

مِيزَانْ رُتُّوعْ

S`= ص+ ظ , Ch چ =  ,Gگ=

إِبْ سِميتْ رَبي أَنَبِّتْ, فَاطِرْ قُدُّومْ وأُكُّورْ

رَبي أرِدْ خَلْقا وسَماء, وكَواكِبْ عُورُورْ

مِينَاتْ رَبي وَهَاء مِدِرْتَا, وعَجائِبْ أَبْحُورْ

لِيلِيتْ ساكِبْ مَيِّيكُو, مِنْ تِرْهانْ  و إِكْرورْ

حُويِئ بَشَرِينِي سَاكِبْ لِگْبا, وإِبْ كيرْ بِشُّورْ

حِلايْ تِگْرايِتْ إِبْ عَربِي تُرْجُومْ رَايُو وفُسُّورْ

تگْرَايِتْ شَبِيقْ تَتْقَاطِرْ, وعَطْبَايَا ظُورُورْ

زَعَاتَا زِبَدْ بُو وحِيسَاسْ, حُفُوسْ تُو ووُظُّورْ

إِتْ كَدَنْ لِتْكّعِى, حِيلبَاىْ أَلَبُو, ديبْ تَبِّلْ وعَمُورْ

نِسَّالْ تِگْرى تُكُوم تُو وبَارِهْ, ظُنُوعْ أَلَبُو وكُرْكُورْ

حِيلْفَاىْ گَبَى لِتْگَالَيُو, كُمْ شَوِيتْ بَرْهِي مِنْ شِيمُو فُرْفُورْ

ونِسَّالْيئ إِبْ تِگْرايِتْ, طُلُّوقْ تُو و بُرُورْ

وأنَا إِگْلُو لامِدْ أَنا, وُسُّوكْ أَلَبْيِئ وحُوبُورْ

لامِدْ هِگْيَا وُلُّوفْ تُو, وطَبَاىْ حَلِيبْ گُرْگُورْ

حَمِّدِي إِگِلْ وَدْعَدْ, لَبَعَلاّ سِمِّعيتْ وشُعورْ

وإِگِلْ شَاكاتْ وقِيرَأتَا, أَبْرَارْ وأحْمَدْ ومَنْسُورْ

سَنِّي لِحِمِّى ولَحَمِّدْ, وأُكُّويْ حِبُوعْ تُو وإِچْفُورْ

حَمْدِى سَنِّي دَگَفَاتَا, وحِمِيتُو حِگِى تَا وحَظُورْ

رَبي سَبْ هِجِكْ لِيدينَا, وسَبْ دِگِمْ أَرِدْ حُرُّورْ

ارتريا نَاى كُلُّو تَا, إبْ مِيزَانْ رُتُّوعْ ودَسْتُورْ

شَعَبِ ارتريا كُوفُولْ تُو, وهَگَگِيتْ تُو أمُّورْ

كِلْ قُومِيَتْ هَگْيَاهَا بَا, مِنْ أُسُولْ وجُزُورْ

وكِلْ أُوْرُوتْ إبْ هَگَياهُو, عَالمْ تُو وطُوُورْ

كِلْ أُوْرُوتْ إبْ عَاداتْ تُو,عَزِيزْتُو وكُبُّورْ

مِيرْحَاىْ دُسْتُورْ ألَبُو, أُبُويْ تُو ونُكُورْ

عَمَارْ ألَبُو, وإِيْ لَأنَبِّرْ ديبْ عُمُّورْ

حُوبُورْ إِيْ لأَكَبْ وإِيْ جَمِعْ فُنْطُورْ

سَلامْ ألَبُو إِگِلْ عَايرْ, وأَمانْ إِگِلْ فُرُورْ

عِلِمْ ألَبُو إِگِلْ قَاوِي, و شِقِلْ إِگِلْ مُهُورْ

سَدَيِتْ ألَبُو إِگِلْ زُمُوتْ, وسَفُوفْ إِگِلْ حُكُّورْ

نَبْرَا ألَبُو إِگِلْ عُوفويْ, وسِرايْ إِگِلْ عُدُّورْ

عَداگَا ألَبُو إِگِلْ تاجِرْ, ومَالْ إِگِلْ دُبُورْ

مَلَهَىْ مِنْ أَدْبِرْ ألَبُو, و مِنْ گَادِمْ دُهُورْ

مَلِهِيَامُو أَرْبعْ تُوم إِتِّي أَلَبُومْ وفُگُورْ

أُوْرُوتْ لُگُومْ تُو, وكالِئْ عُوُورْ

سَالِسْ ظُمُومْ تُو, ورَابيعْ سُوبُورْ

وحَتَى لإِيْ لأَمِّرْ گُدُوفْ تُو ووُگُورْ

قَاوِي ظِلْمَتْ أَدَّحَا تُو وآَمِرْ إِگِلْ ظِلْمَتْ نُورْ

مَقْرِحْ وگُومَاتْ مِسِلْ گَلْگَلاىْ عُشُّورْ

كِبْرِيتْ وحَشَر مِسِلْ أَباى مَكْرُهْ وقُدّوُرْ

حِلاىْ و مَدَحْ, إِگِلْ سَنِّي وشِيكْ وُقُّورْ

عِيَرْ وهِيرَرِيتْ, إِگِلْ أُكُّويْ سَفِيه وطُرْطُورْ

سَفِئْ ومَنْفِيتْ إِگِلْ مِيرْحَاىْ رُتُّوعْ ودُحُورْ

سَيفْ وكُوناتْ إِگِلْ مِيرْحَاىْ رُگُومْ ومَسْعُورْ

هِگْيا أَمانْ مَرّارْتا وإِبِيتْ, حِبُوعْ تَفَگِرْ وسِتُورْ

هِگْيا حَسَّتْ طِعِمْتا وفِتِيتْ, دُفُونْ تحَبعْ وقُبُورْ

رِحِيئ رَبي تُو نِيسآيَا, حُمُويْ أنَا ومُرُورْ

اِسَلامْ تُو دِينْيئ, بُدُّولْ مِنُّو إِيْ أَنَا وقُيُورْ

إِبْ اِنْجيلْ أمنْ وإِبْ تَوْراتْ وإبْ زَبُورْ

سِتَّايِئ مَاى وحَليبْ, وبِلَّلعيِئ حَلالْ ومُقُّورْ